ኢትዮጵያ ወረርሽኞችን የሚያስከትሉትን ማህበራዊና ኢኮኖሚያዊ ተጽእኖ ለመቀነስ ተሰናድታ መጠበቅ አለባት ተብሏል

መስከረም 28 2018

ዓለም በየጊዜው አዳዲስ እንዲሁም ዓይነታቸው የሚለዋወጥ ወረርሽኞች እያስተናገደች ነው፤ እንደ ኮቪድ 19 ያሉት ደግሞ ከፍተኛ ተጽዕኖ በሁሉም መስክ አሳድረዋል፡፡

ኢትዮጵያ ወቅታዊ ወረርሽኞችን በተመለከተ የሚያስከትሉትን የጤና ጉዳት በተጨማሪም በማህበራዊና ኢኮኖሚያዊ መስኮች የሚደርሰውን ተጽእኖ ለመቀነስ ተሰናድታ መጠበቅ አለባት ተብሏል።

ለዚህም ለመጪዎቹ አምስት ዓመታት ያህል የሚሰራበትን ስትራቴጂ በቅርቡ ይፋ አድርጋለች፡፡

በአለም አቀፍ ደረጃ የወረርሽኞች ስፋት እንዲሁም የመከሰት መጠን እየጨመረ መምጣቱን የሚናገሩት በኢትዮጵያ ህብረተሰብ ጤና ኢንስቲትዩት የአለም አቀፍ የጤና ደንብ እና የአንድ ጤና ጽህፈት ቤት ሀላፊ የሆኑት ዶክተር ፈይሳ ረጋሣ ይህንንም ለመቋቋም ሀገራት ራሳቸውን ማዘጋጀት እንዳለባቸው እና ኢትዮጵያም በዚህ ላይ እየሰራች መሆኑን ይጠቅሳሉ፡፡