ከተማሪዎች ንቅናቄ ጀምሮ የተፈጠሩ የማያግባቡ ትርክቶች መፍትሔ እንዲፈለግላቸው ተጠየቀ።

ህዳር 3 2018

የህዝብን ስሜት ለመሳብ እና የፖለቲካ ቅቡልነት ለማግኘት ተብለው ከተማሪዎች ንቅናቄ ጀምሮ የተፈጠሩ የማያግባቡ ትርክቶች መፍትሔ እንዲፈለግላቸው ተጠየቀ።

ትርክቱን የፈጠሩት አንዳንድ የብሄር ፖለቲካ አራማጆች እና የፖለቲካ ድርጅት መስራቾች በሰሩት ስህትት ቢፀፀቱም ትርክቱ ከእነሱ ቁጥጥር ውጪ ስለሆነ ችግሩን መፍታት እና የተከሰተውን ቀውስ ማረም እንዳልተቻለም ተነግሯል፡፡

ይህ የተጠየቀው የኢትዮጵያ ሞያ ማህበራት ባለፈው ቅዳሜ ጥቅምት 29 ቀን 2018 ዓ.ም ታሪክ እና ትርክትን መሰረት አድርጎ ባዘጋጀው የውይይት መድረክ ላይ ነው።

በውይይቱ ላይ መነሻ ሀሳብ ያቀረቡት የታሪክ አጥኚው እና የኢትዮጵያ ታሪክ ባለሞያዎች ማህበር ፕሬዝዳንት ባህሩ ዘውዴ(ፕ/ር) ትርክት ማለት ለጥሩም ሆነ ለመጥፎ ዓላማ ታሪክን ለውስን ወይም ለራስ ፍላጎት ብቻ አመቻችቶ ማቅረብ ማለት እንደሆነ አስረድተዋል።